Muhayeyezu Théogène, mwene Sematuro na Mukamazera, utuye Nyamugali, Nyamagabe ;

URUKIKO RW IKIRENGA RURI I KIGALI, RUHABURANISHIRIZA IMANZA Z UBUCURUZI, RUKIJIJE MU RUHAME KUWA 09 NYAKANGA 2010 URUBANZA RCom AA 0007/09/CS MU BURYO BUKURIKIRA: Haburana Uwajuriye : Muhayeyezu Théogène, mwene Sematuro na Mukamazera, utuye Nyamugali, Nyamagabe ; Abaregwa : Banque Commerciale du Rwanda (BCR) SAKIRWA Petroleum yahoze ari BP Fina Ikiburanwa : -déclarer qu il n est pas débiteur de la Banque Commerciale du Rwanda(BCR) ; -ordonner à la Banque Commerciale du Rwanda(BCR) de le rayer de la catégorie de débiteur de classe 5 ; -décider que SAKIRWA Petroleum (BP Fina) a reçu sciemment des sommes d argent qui ne lui étaient pas dues ; -ordonner à la Banque Commerciale du Rwanda(BCR) et à Sakirwa Petroleum de lui payer in solidum la somme forfaitaire de 45.000.000 frw de dommages- intérêts (dépôt, paiement de l indû, intérêts, frais de procédure et honoraires d avocat) ; -exécution provisoire. Icyaregewe : Kujuririra urubanza R Com A 0150/08/HCC rwaciwe kuwa 30/01/2009 n Urukiko Rukuru rw Ubucuruzi. 1.Imiterere y urubanza [1]. Inkomoko y urubanza ni amasezerano yabaye hagati ya MUHAYEYEZU Théogène na BP Fina. Ayo masezerano akaba yaravugwagamo ko BP Fina yagombaga guha ibicuruzwa Société Pétrolière de Gikongoro (SOPEGI) MUHAYEYEZU Théogène yari abereye Perezida (sosiyete itarigeze ibaho kuko statuts zayo zitigeze zisohoka mu Igazeti ya Leta ), akaba yaragombaga kwishyura mu izina rye mu gihe iyo sosiyete itarabona ubuzima gatozi. MUHAYEYEZU Théogène yareze Banque Commerciale du Rwanda (BCR) kuba imufitiye amafaranga ikarenga ikamushyira mu mubare w abayifitiye umwenda. Yanareze kandi SAKIRWA Petroleum (BP Fina) kuba yarafashe amafaranga muri

Banque Commerciale du Rwanda (BCR) ivuga ko ari ubwishyu, kandi nta mwenda yari ayifitiye. Bombi abasaba indishyi. [2]. Kuri icyo kirego cya MUHAYEYEZU Théogène, Urukiko Rwisumbuye rwa Nyarugenge rwagishyikirijwe ku ikubitiro, rwemeje ko urubanza rusibwa kubera ko atitabye ku munsi w iburanisha kandi yarawumenyeshejwe mu buryo bukurikije amategeko. [3]. MUHAYEYEZU Théogène yabyukije urwo rubanza, Urukiko rwemeza ko ikirego cye nta shingiro gifite, ko adakuwe ku rutonde rw abafitiye umwenda Banque Commerciale du Rwanda(BCR), akaba agomba kuyishyura 2.235.911 frw; rumutegeka kwishyura na 89.436 frw y umusogongero wa Leta ndetse no kwishyura amagarama y urubanza. [4]. Ku kirego cy ubujurire MUHAYEYEZU Théogène yatanze mu Rukiko Rukuru rw Ubucuruzi, yatanze ingingo zikurikira : -amategeko agenga imiburanishirize y imanza ntiyubahirijwe kuko Urukiko rwimye ijambo uburanira SAKIRWA Petroleum ntirwanabaza uhagarariye Banque Commerciale du Rwanda(BCR) kwiregura ku bimenyetso biri muri dosiye ; -amategeko y igihugu ntiyitaweho : nko kuvuga ko kutubahiriza igihe cy isomwa ry urubanza byemewe, kwishyura sheki itazigamiwe ngo biremewe, kwishyura ideni ry undi ngo nta kibazo ; -Urukiko rwerekanye aho rubogamiye kuko rwavuze ko nta bimenyetso yatanze kandi harimo inyandiko 16 zishyigikira ibyo avuga ; - Urukiko rwirengagije ko mu manza z ubucuruzi ikimenyetso cyose cyemewe kandi gitangirwa aho kibonekeye. Urukiko Rukuru rw Ubucuruzi rwahamishijeho imikirize yo mu Rukiko Rwisumbuye rwa Nyarugenge, rumutegeka kwishyura SAKIRWA 500.000 frw y indishyi kubera kuyikurura mu manza ku maherere na 500.000 frw y igihembo cya Avoka. Urukiko rufata icyo cyemezo rukaba rwarashingiye ahanini ku mpamvu z uko Muhayeyezu adatanga ibimenyetso by ibyo avuga. [9]. Mu bujurire bwe muri uru Rukiko, MUHAYEYEZU Théogène yatanze ingingo ziteye zitya : I.Urubanza ntirugaragaza impamvu rushingiyeho (manque de motivation en fait et en droit). Uretse ko n imyandikire y urwo rubanza idasanzwe, urubanza ntirugaragaza imiburanire y ababuranyi, ntirugaragaza amategeko rwashingiyeho, nta n icyo ruvuga ku bimenyetso binyuranye byatanzwe n urega ; II.Urukiko rwaciye urubanza rushingiye ku nyandiko yasabaga gushyiraho umuhanga no gukora iperereza yatanzwe nyuma y iburanisha hatabayeho isubukurwa ry iburanisha ;

III.Imvugo zidahwitse ziri mu rubanza(frivole, affirmations gratuites, vagues, doubles ou triple ) bigaragaza ubushake buke abacamanza bagaragaje mu gusuzuma ikibazo ; IV.Amategeko y igihugu ntiyitaweho : nko kuvuga ko kutubahiriza igihe cy isomwa ry urubanza byemewe, kwishyura sheki itazigamiwe ngo biremewe, kwishyura ideni ry undi ngo nta kibazo ; V.Gufata ibyo uhagarariye Banque Commerciale du Rwanda(BCR) yavuze nk ihame bitanatangiwe ibimenyetso ; VI.Kuvuga ko mu rwego rw ubujurire hatakwifashishwa ikimenyetso gishya ntibagaragaze itegeko babishingiraho mu gihe bizwi ko ikibujijwe ari ikirego gishya ; VII.Kwemeza ko ibyo Banque Commerciale du Rwanda(BCR) isaba ibyemerewe ariko ntihagaragazwe ibyo aribyo ; VIII.Abacamanza ntibasobanura impamvu urwo rubanza rwasomwe nyuma y igihe gitegetswe cy ukwezi. [5]. Uko MUHAYEYEZU Théogène abisobanura, avuga ko igihe yari akiri mu buhungiro, BP Fina yari yagiranye amasezerano nayo mu ntangiriro, yamuciye inyuma ikorana amasezerano kuwa 26/09/1995 n abandi banyamuryango bari bagize iyo sosiyete baringa, muri ayo masezerano abo banyamuryango bakayemerera ko bayifitiye umwenda ungana na 4.850.779 frw kandi mu by ukuri BP Fina ariyo ibagomba amafaranga, ngo kubera ko ibicuruzwa byose yabonye byari bifite agaciro kangana na 6.922.253 Frw, hakwiyongeraho transport bikaba byose hamwe 7.867.939 frw. [6]. Ko ngo muri ayo mafaranga hagombaga kuvanwamo agaciro ka za bons (361.495 frw) z aba clients ba BP Fina Société Pétrolière de Gikongoro (SOPEGI) yari yarahaye essence cyangwa mazout batishyuye. Ko kandi ngo yari yarashyize kuri compte n 46982 ya BP Fina muri Banque Commerciale du Rwanda(BCR) 5.402.615 frw, binakubitiyeho ko BP Fina yafashe chèque ya 2.087.888 frw yari yarabasigiyeho ingwate muri 1994 ikayijyana muri Banque Commerciale du Rwanda(BCR) muri 1997, Banque Commerciale du Rwanda(BCR) ikabishyura ayo mafaranga yari yanditseho mu gihe agaciro kayo kari kararengeje igihe, kandi kuri iyo konti ngo nta mafaranga agera kuri uwo mubare yari ariho, Banque Commerciale du Rwanda(BCR) ikavuga ko ikinyuranyo ngo ari ideni ababereyemo ryafashwe nka découvert/overdraft. Muri make akaba avuga ko BP Fina yahawe 12.702.777 Frw ku ideni ritarengaga 7.000.000 Frw. Akaba asaba ko 4.850.779 frw yishyuwe mu buryo butari bwo yasubizwa, akanasaba 45.000.000 frw y indishyi z akababaro kubera kudashobora gukora business no kuba adashobora kubona inguzanyo muri banki. [7]. SAKIRWA Petroleum ku ruhande rwayo, ikaba yemeza ko Société Pétrolière de Gikongoro (SOPEGI) na BP Fina bicaye bagakora imibare bagamije kureba icyo buri ruhande rugomba urundi, bagasanga Société Pétrolière de Gikongoro (SOPEGI)

igomba BP Fina 4.850.779 frw, bikaba bitumvikana ukuntu Muhayeyezu Théogène yahakana ibyakozwe na Société Pétrolière de Gikongoro (SOPEGI) mu gihe ibyemezo byafashwe nayo, mu babishyizeho umukono harimo n umugore we Madamu Muhayeyezu Byamuneza Afia. Ikindi ngo ni uko «reconnaissance de dette» yakozwe na Société Pétrolière de Gikongoro (SOPEGI) kandi MUHAYEYEZU Théogène akaba yarareze mu izina rye, akaba nta bubasha afite bwo kwanga umwenda wemewe n undi muntu. [8]. Ku ruhande rwa Banque Commerciale du Rwanda(BCR), Maître NKURUNZIZA François Xavier akavuga ko MUHAYEYEZU Théogène yamenyeshejwe ingano y umwenda afitiye Banque kuwa 17/12/2001, ko kuva icyo gihe atigeze awuhakana kandi ko iyo aza kuba atawemera, aba yarabigaragaje mu gihe kitarenze iminsi 30 nkuko ingingo ya 35 ya «règlement général des opérations» ibiteganya, ko ngo kuba atarabikoze ni uko yawemeraga. Ku byerekeye kuba Banque yarishyuye chèque itazigamiwe Maître NKURUNZIZA François Xavier yavuze ko nta kosa yakoze. Ko ngo ubwo bushobozi ibufite, ko ishobora kwanga kwishyura ariko ko idategetswe kwanga. Ko izo mvugo arizo Urukiko Rukuru rw Ubucuruzi rwasesenguye, ruca urubanza ko MUHAYEYEZU Théogène atsindiwe ibyo aregera kuko nta bimenyetso abitangira, ko no muri uru Rukiko nta bindi bimenyetso yungutse. [9]. Maître NKURUNZIZA François Xavier yatanze ikirego cy ubujurire bwuririye ku bundi asaba ko amafaranga basabye mu rwego rw ubujurire bwa mbere yakomeza kubyara inyungu kugeza umwenda wose wishyuwe. Ko yari 14.300.730 Frw ubu akaba amaze kugera kuri 17.837.514 Frw. Yanasabye 10% yayo y ikurikiranarubanza. [10]. Mu rwego rwo kugirango rusobanukirwe neza ibivugwa n ababuranyi, Urukiko rwafashe icyemezo cyo guhamagara Bizimana Emmanuel na Mureramanzi Emmanuel bari Perezida na Vice Perezida ba Société Pétrolière de Gikongoro (SOPEGI), na Madamu Muhayeyezu Byamuneza Afia kugirango bazatange ibisobanuro ku bijyanye n umwenda ungana na 4.850.779 Frw Société Pétrolière de Gikongoro( SOPEGI) yarishye icyahoze ari BP Fina. Hitabye Mureramanzi Emmanuel na Madamu Muhayeyezu Byamuneza Afia, Urukiko rufata icyemezo cyo kubumva. [11]. Umutangabuhamya Mureramanzi Emmanuel amaze kurahira, yabajijwe imikoranire ye na MUHAYEYEZU Théogène ndetse na BP Fina ubu yabaye SAKIRWA Petroleum mu gucuruza ibikomoka kuri peteroli, avuga ko mbere y intambara bishyize hamwe ari abantu icumi(10) bashinga sosiyete yo gucuruza carburant bayita Société Pétrolière de Gikongoro (SOPEGI), bitoramo Perezida ariwe MUHAYEYEZU Théogène. Yakomeje avuga ko bagiranye amasezerano na BP Fina ko izajya ibaha iyo carburant bakayicuruza nabo bakayishyura hakurikijwe amasezerano. Yavuze ko intambara yaje gutera MUHAYEYEZU Théogène agahunga, aho agarukiye muri 2002, bakamubaza aho amafaranga yari yaracuruje yayashyize, akababwira ko yagiye ayaguriza abantu, ariko ngo bateranya ayo avuga yagurije abantu, bagasanga atangana n ayo yacuruje.

[12]. Yabajijwe aho umwenda wa 4.850.000 Frw waturutse n ukuntu bawumenye, avuga ko bajya kuwemera bashingiye kuri historique bancaire bahawe na ENGEN yari yarasimbuye BP Fina, abajijwe niba barahise bawemera nta mpaka zibaye, asubiza ko ntaho bari guhera bawuhakana kuko uwari ufite amakuru ariwe MUHAYEYEZU Théogène ntawari uhari, kandi nta nyandiko yari yarabasigiye ngo bazihereho. Yongeye kubazwa niba aho MUHAYEYEZU Théogène ahungukiye uwo mwenda yarawemeye, asubiza ko babimubajije ntiyagira inyandiko abereka, ngo ahubwo ahitamo kujya kubarega avuga ko ngo bahombeje sosiyete kubera amafaranga bishyuye. Ku kibazo cyo kumenya niba muri uyu mwenda, chèque en garantie ya 2.087.888 Frw ivugwa na Muhayeyezu Théogène yari irimo, dore ko avuga ko yayisigiye BP Fina ho ingwate muri 1994 nayo ikayijyana muri Banque Commerciale du Rwanda(BCR) muri 1997, Mureramanzi Emmanuel yashubije ko iriya chèque en garantie batigeze bayimenya, ko ari ubwa mbere ayumvise. [13]. Madamu Muhayeyezu Byamuneza Afia nawe Urukiko rwamubajije ibisobanuro ariko agaragaza ko ibyo by umwenda atabizi II. Ibisubizo by Urukiko ku ngingo z ubujurire. 1. Ku byerekeye ko Urukiko rutagaragaza impamvu rwashingiyeho (manque de motivation en fait et en droit), ntirugaragaze imiburanire y ababuranyi, ndetse n amategeko rwashingiyeho. [14]. Nkuko bigaragara mu rubanza rwajuririwe, Urukiko Rukuru rw Ubucuruzi ruhereye ku miburanire y ababuranyi, rwavuye imuzingo ibibazo byose byagaragajwe na Muhayeyezu Théogène, rubihera mu mizi rubisubiza uko yari yabirushyikirije arinako rugenda rubisobanura ikibazo ku kindi, rwerekana aho rukuye icyemezo cyarwo kuri buri kibazo. Urubanza kandi rugaragaza ko buri muburanyi yagiye ahabwa urubuga rwo kwisobanura akavuga uko abona ikibazo n igisubizo gikwiranye nacyo. Ku kibazo cy uko amategeko yashingiweho atagaragajwe, uretse ko hari n ingingo zayo zashingiweho, Urukiko rusanga gushingira ku mategeko mu rubanza si ukuyarondora yose uko yakabaye, icyangombwa ni uko ibyo urubanza ruvuga bitanyuranyije nayo. Bityo iyi ngingo ikaba nta shingiro ifite. 2. Ku byerekeye ko urukiko rwaciye urubanza rushingiye ku nyandiko yasabaga gushyiraho umuhanga no gukora iperereza yatanzwe nyuma y iburanisha hatabayeho isubukurwa ry iburanisha. [15]. Ingingo ya 62 y itegeko n 18/2004 ryo kuwa 20/06/2004 ryerekeye imiburanishirize y imanza z imbonezamubano, izubucuruzi, iz umurimo n iz ubutegetsi nkuko ryahinduwe kugeza ubu, ivuga ko «nta kimenyetso, inyandiko muri rusange, imyanzuro y urubanza n inyandiko ikubiyemo ingingo ziburanishwa bishobora kohererezwa Urukiko nyuma y iburanisha. Ko ariko nyamara, iyo mbere yo guca urubanza habonetse inyandiko cyangwa se ikindi kintu gishya kizafasha mu kugaragaza ukuri kivumbuwe n umwe mu baburanyi,

ashobora mu gihe urubanza rutaracibwa kugishyikiriza Urukiko, maze akakimenyesha umuburanyi we. Urukiko ubwarwo ni rwo rusuzuma niba ari ngombwa gusubukura iburanisha». [16]. Nkuko bigaragara mu rubanza rwaciwe n Urukiko Rukuru rw Ubucuruzi ku rupapuro rwa cyenda(9), nyuma yuko iburanisha ripfundikirwa, Muhayeyezu Théogène mu ibaruwa ye yo kuwa 12/01/2009, niwe wasabye Urukiko ko rwashyiraho impuguke(expert) izasesengura inyandiko ikanazisobanura zigaragaza ko yishyuye inshuro eshatu umwenda umwe, ngo byanaba ngombwa Urukiko rukigerera muri Banque rugasuzuma imikoreshereze ya compte ya BP Fina. Kuri iyo ngingo, Urukiko rumaze gusuzuma ibyo asaba, rwamushubije ko atarirwo rujya kumushakira ibimenyetso bishyigikira ibyo avuga yagombye kuba yaritangiye ubwe akigeza ikirego mu nkiko, ibyo asaba rurabimwangira. [17]. Uru Rukiko rusanga Urukiko Rukuru rw Ubucuruzi rwarasuzumwe inyandiko rwashyikirijwe nyuma y iburanisha n ibiyisabwamo, ruyiha agaciro kayo, rusanga ibyo umuburanyi arusaba ariwe wagombaga kuba yarabizanye kuko ari ibimenyetso bishyigikira ikirego cye. Ntabwo rero byari bikibaye ngombwa ko iburanisha risubukurwa kuko Urukiko rwari rumaze kwerekana ko uko gushyiraho impuguke no kujya gukora iperereza bitari ngombwa. Ibyo rukaba rwarabikoze rushingiye ku ngingo ya 62 y itegeko ryavuzwe haruguru. Rukaba rero nta kosa rwakoze rubyemeza rutyo, bityo iyi ngingo ikaba nta shingiro ifite. 3. Ku byerekeye imvugo zidahwitse ziri mu rubanza, no kutubahiriza igihe cy isomwa ry urubanza. -a. ku mvugo zidahwitse : [18]. Umwuga w Ubucamanza urangwa n imvugo yawo yihariye itandukanye n ikoreshwa mu yindi myuga. Ni muri urwo rwego, mu myandikire y imanza, umucamanza asabwa gukoresha amagambo asukuye, arangwamo ubupfura no kubaha umuburanyi cyane cyane uwatsinzwe, akirinda amagambo asesereza atera umuburanyi kwiheba. Amagambo nk ayo, uko atagomba gukoreshwa mu iburanisha, ntagomba no kugaragara muri kopi y urubanza. Bimwe mu bigomba kuranga urubanza ruciye neza, ni amagambo asukuye atagira uwo akomeretsa kandi ajyanye n umwuga w ubucamanza. Ibyo ariko iyo bibuze, ntabwo byaba impamvu y ubujurire kugirango ireme ry icyaregewe gihinduke, kuko ntaho amagambo asukuye ahurira n urubanza nyirizina. -b. kutubahiriza igihe cy isomwa ry urubanza : [19]. Ingingo ya 149 y itegeko n 18/2004 ryo kuwa 20/06/2004 ryerekeye imiburanishirize y imanza z imbonezamubano, izubucuruzi, iz umurimo n iz ubutegetsi nkuko ryahinduwe kugeza ubu, iteganya igihe urubanza rugomba kuba rwasomewemo uhereye igihe iburanisha ryapfundikiriwe. Ni iminsi mirongo itatu(30). Iyo ngingo ikomeza ivuga ko iyo nta mpamvu igaragara yatumye isomwa ritaba muri icyo gihe

cyateganyijwe, Perezida w Urukiko urwo rubanza rurimo, akorera raporo Perezida w Urukiko rwisumbuyeho avuga impamvu y ubwo butinde. Ahangaha bikaba byumvikana ko ari ikibazo kirebana n ubuyobozi bw inkiko, gishobora kuganisha gusa ku bihano uwo mucamanza utarasomeye urubanza ku gihe yahabwa bibaye ngombwa, ariko si impamvu yatuma urubanza rwaciwe ruba impfabusa. Bityo izo ngingo zombi zikaba nta shingiro zifite. 4. Ku byerekeye ko Urukiko rwafashe nk ihame ibyo uhagarariye Banque Commerciale du Rwanda(BCR) yavuze bitanatangiwe ibimenyetso. [20]. Nkuko bigaragara mu rubanza rwaciwe n Urukiko Rukuru rw Ubucuruzi ku rupapuro rwa karindwi(7), Banque Commerciale du Rwanda(BCR) yerekanye historique ya compte ya MUHAYEYEZU Théogène hagati ya 01/01/1994 na 17/11/1997 yerekana ko kuwa 31/12/1994, amafaranga MUHAYEYEZU Théogène yari afite kuri compte ari 101.977 Frw, nyuma akaza gutanga chèque ya 2.087.888 Frw yishyuwe kuwa 02/01/1997, bityo agasigaramo umwenda wa 1.985.911 Frw, ko kuva icyo gihe atigeze awuhakana, ahubwo ko muri 2006 ni ukuvuga nyuma y imyaka icyenda(9), ariho yandikiye Banque Commerciale du Rwanda(BCR) ayisaba kumugezaho ibyerekeye iyo chèque kugirango arangize ikibazo cyayo. Urukiko ruhereye kuri iyo historique, rwaciye urubanza ruvuga ko MUHAYEYEZU Théogène nta bimenyetso yatanze bivuguruza ibyo Banque Commerciale du Rwanda(BCR) yavugaga. Ntabwo rero byafashwe nk ihame kuko ntabwo MUHAYEYEZU Théogène yimwe ijambo, yaravuze ariko nkuko Urukiko rubivuga ntiyashobora kubona ibimenyetso bivuguruza ibyari byatanzwe na Banque Commerciale du Rwanda(BCR). Iyo ngingo nayo ikaba nta shingiro ifite. 5. Kuvuga ko mu rwego rw ubujurire hatakwifashishwa ikimenyetso gishya, Urukiko ntirugaragaza itegeko rushingiraho mu gihe bizwi ko ikibujijwe ari ikirego gishya. [21]. Iyi ngingo nta shingiro ifite kuko adasobanurira Urukiko aho Urukiko Rukuru rw Ubucuruzi rwabyifashishije mu guca urubanza, ngo anasobanure n icyo yifuza ko uru Rukiko rwamukorera, yerekana ko icyemezo Urukiko rwafashe muri buriya buryo hari aho cyamurenganyije 6. Ku byerekeye ko Urukiko rwavuze ko ibyo Banque Commerciale du Rwanda(BCR) isaba ibyemerewe ariko ntirugaragaze ibyo aribyo. [22]. Mu cyemezo Urukiko rwafashe, rwavuze ko urubanza rwajuririwe ruhamyeho, ko ibyo Banque Commerciale du Rwanda(BCR) yari yaregeye ikabihabwa bigumyeho uko byakabaye. Bikaba byumvikana ko ibyo yahawe bikubiye mu rubanza rwajuririwe. Kuba bitaravuzwe muri uru rubanza bikaba bitafatwa nkaho bitazwi. Iyi ngingo nayo ikaba nta shingiro ifite. Ku byerekeye ubujurire bwuririye ku bundi bwa Banque Commerciale du Rwanda(BCR).

[23]. Banque Commerciale du Rwanda(BCR) irasaba ko umwenda wakomeza kubyara inyungu kugeza wishyuwe wose, ikanatanga n imibare w aho wari ugeze ubungubu, ariko nta kimenyetso yereka Urukiko cyemeza ko uwo mwenda ari hariya wari ugeze koko. N amafaranga y ikurikiranarubanza angana na 10% y umwenda wose Urukiko ntirwabona aho ruhera ruyatanga mu gihe rutagaragarijwe ingano y uwo mwenda, bityo ubwo bujurire bwuririye ku bundi bukaba nta shingiro bufite. Hashingiwe ku bimaze kuvugwa, Urukiko rusanga ingingo zose z ubujurire zatanzwe na MUHAYEYEZU Théogène nta shingiro zifite. III. Icyemezo cy Urukiko [24]. Rwemeje ko ubujurire bwa MUHAYEYEZU Théogène nta shingiro bufite ; [25]. Rwemeje ko ubujurire bwuririye ku bundi bwa Banque Commerciale du Rwanda(BCR) nta shingiro bufite ; [26]. Rwemeje ko imikirize y urubanza RCOM AA 0007/08/CS idahindutse ; [27]. Rutegetse MUHAYEYEZU Théogène na Banque Commerciale du Rwanda(BCR) gufatanya kwishyura amafaranga y u Rwanda ibihumbi mirongo ine na bine na magana inani(44.800) Frw y amagarama y urubanza, abariwemo n ayo Urukiko rwarubanjirije, batayatanze mu gihe cy iminsi munani(8), agakurwa mu byabo ku ngufu za Leta. RUKIJIJWE RUTYO KANDI RUSOMEWE MU RUHAME NONE KUWA 09/07/2010 N URUKIKO RW IKIRENGA, RUGIZWE NA: MUTASHYA JEAN BAPTISTE: PEREZIDA, MUKANYUNDO PATRICIE NA MUKAMULISA MARIE THERESE: ABACAMANZA, BAFASHIJWE NA MUSENGAMANA VIATEUR : UMWANDITSI W URUKIKO. Sé MUTASHYA Jean Baptiste Perezida Sé MUKANYUNDO Patricie Umucamanza Sé MUKAMULISA Marie Thérèse Umucamanza Sé MUSENGAMANA Viateur Umwanditsi w Urukiko